कोंढवा परिसरातील अनधिकृत बांधकामांवर कारवाई न झाल्यास रस्त्यावर उतरणार असल्याचा इशारा नगरसेवक काशिफ सय्यद यांनी दिला आहे.
नगरसेवक काशिफ सय्यद यांची पत्रकार परिषद
पुणे: कोंढवा परिसरातील कौसर बाग आणि लगतच्या भागातील सार्वजनिक रस्त्यांवर तसेच पदपथांवर दिवसाढवळ्या चाललेली अनधिकृत बांधकामे, इमारतींच्या फ्रंट व साईड मार्जिनचा नियमबाह्य व्यावसायिक वापर आणि त्यामुळे होणारी असह्य वाहतूक कोंडी याविरोधात स्थानिक नगरसेवक काशिफ सय्यद यांनी आक्रमक पवित्रा घेतला आहे.
पुणे महानगरपालिकेच्या सर्वसाधारण सभेत प्रशासकीय ढिसाळपणाचे वाभाडे काढल्यानंतर, आयोजित पत्रकार परिषदेत त्यांनी बेकायदेशीर व्यावसायिक, त्यांना पाठीशी घालणारे घटक आणि सुस्त महापालिका प्रशासनावर जोरदार निशाणा साधला.
कौसर बागेतील अनधिकृत व्यावसायिक साम्राज्य आणि रस्त्यांची चोरी आता खपवून घेणार नाही
उच्च न्यायालयाच्या आदेशानंतर महापालिकेने तातडीने पावले न उचलल्यास तीव्र आंदोलनाचा इशारा
५ ते ६ मीटरचे रस्ते गायब; डीपा नकाशावर दरोडा?
विकास आराखड्यानुसार (DP) कौसर बाग ते वेलकम हॉल / पारगे नगर, ब्रह्मा एक्सब्रूइन्स रस्ता ते कुल होम्स आणि शीतल पेट्रोल पंप ते ज्योती चौक हे सुमारे २० ते २२ मीटर रुंदीचे अधिकृत रस्ते आहेत.
मात्र, महापालिकेने प्रत्यक्ष जागेवर मोजणी केली असता, हे रस्ते केवळ १६ ते १७ मीटरच शिल्लक असल्याचे धक्कादायक वास्तव समोर आले आहे.
“उर्वरित ५ ते ६ मीटरचे सार्वजनिक रस्ते आणि पादचाऱ्यांचे हक्काचे पदपथ नेमके गेले कुठे?” असा संतप्त सवाल उपस्थित करत काशिफ सय्यद यांनी शहराच्या नियोजनबद्ध नकाशावर उघड दरोडा टाकणाऱ्यांची दादागिरी खपवून घेतली जाणार नाही, असे ठणकावून सांगितले.
प्रभाग क्रमांक १९ मध्ये लहान मुले, महिला आणि ज्येष्ठ नागरिकांना चालण्यासाठी एक इंचही पदपथ शिल्लक न ठेवता संपूर्ण परिसर अनधिकृत व्यावसायिक आणि अनधिकृत खाऊगल्लीच्या घशात घालण्याचा कट रचला गेल्याचा आरोप त्यांनी केला.
न्यायालयाच्या ‘स्टे’ची पळवाट संपली!
इमारतींच्या समोरील आणि बाजूच्या मोकळ्या जागांवर (Front & Side Margins) बेकायदेशीर पक्के-कच्चे शेड्स ठोकून महापालिकेच्या नियमांची पायमल्ली करणाऱ्या व्यावसायिकांना सय्यद यांनी थेट इशारा दिला आहे.
वर्षानुवर्षे न्यायालयातील तथाकथित स्थगिती आदेशांचा (Stay) गैरवापर करून जनतेला वेठीस धरणाऱ्यांची पळवाट आता संपुष्टात आली आहे.
फ्रंट मार्जिनच्या नावाखाली रस्त्यांची गळचेपी करणे, उघड्यावर भट्ट्या व शेगड्या पेटवून आगीचा धोका निर्माण करणे आणि आपत्कालीन रुग्णवाहिका वा अग्निशामक दलाचा मार्ग रोखणे हा अक्षम्य गुन्हा आहे.
कायद्याचा धाक न बाळगणाऱ्या अशा सर्व अनधिकृत व्यावसायिकांवर आता धडक मोहीम राबवली जाईल, असा इशारा त्यांनी दिला.
मुंबई उच्च न्यायालयाचा ‘हा’ निर्णय ठरणार निर्णायक
याच पार्श्वभूमीवर मुंबई उच्च न्यायालयाने Writ Petition No. 9329 of 2026 मध्ये दिलेला निकाल अत्यंत निर्णायक ठरला आहे.
रस्त्यांवरील अतिक्रमणे रोखणे आणि पदपथ निर्बंधमुक्त ठेवणे हे महानगरपालिकेचे प्राथमिक वैधानिक कर्तव्य असल्याचे उच्च न्यायालयाने स्पष्ट केले आहे.
न्यायालयाने पालिकेला कायद्यानुसार संबंधितांना रीतसर नोटिसा बजावून तातडीने अंतिम कारवाई करण्याचे निर्देश दिले आहेत.
न्यायालयाच्या या स्पष्ट आदेशानंतर आता महापालिका आयुक्त किंवा अतिक्रमण विभागाकडे टोलवाटोलवी करण्यासाठी कोणतीही सबब शिल्लक उरलेली नाही, असे सय्यद यांनी स्पष्ट केले.
‘एसीबी’ चौकशीची मागणी आणि आंदोलनाचा इशारा
पुणे महानगरपालिकेच्या सभेत शहर अभियंत्यांनी या प्रकरणी तातडीने संयुक्त पाहणी करून फ्रंट मार्जिनवरील नियमबाह्य वापराबर कडक कारवाई करण्याचे आश्वासन दिले आहे.
मात्र, जर महापालिका प्रशासनाने नेहमीप्रमाणे केवळ कागदी नोटिसांचा खेळ मांडून डोळेझाक केली किंवा आर्थिक हितसंबंधांतून मवाळ भूमिका घेतली, तर लोकप्रतिनिधी म्हणून आपण गप्प बसणार नाही.
या संपूर्ण अतिक्रमण रॅकेटची आणि वर्षांनुवर्षे मिळालेल्या बेकायदेशीर स्थगिती प्रकरणांची लाचलुचपत प्रतिबंधक विभागामार्फत (ACB) व नगरविकास विभागामार्फत उच्चस्तरीय चौकशी झालीच पाहिजे, अशी ठाम मागणी त्यांनी केली.
अन्यथा, नागरिकांना सोबत घेऊन रस्त्यावर उतरून तीव्र आंदोलन छेडले जाईल, असा सज्जड दम त्यांनी दिला.
नागरिकांच्या या ज्वलंत प्रश्नाला वाचा फोडणाऱ्या माध्यम प्रतिनिधींवर दबाव आणणे किंवा त्यांना धमकावण्याचे भ्याड प्रकार खपवून घेतले जाणार नाहीत, असे सांगत काशिफ सय्यद यांनी पत्रकारांच्या पाठीशी ठामपणे उभे राहण्याची ग्वाही दिली. कौसर बाग परिसरातील प्रत्येक इंच रस्ता आणि पदपथ मूळ आराखड्यानुसार खुला होईपर्यंत ही कायदेशीर आणि मैदानी लढाई कोणत्याही दबावाला बळी न पडता शेवटपर्यंत लढली जाईल, असा निर्धार त्यांनी शेवटी व्यक्त केला.
– काशिफ फखरुल सय्यद
(नगरसेवक, पुणे महानगरपालिका, कोंढवा, प्रभाग क्र. १९)
