दहीहंडी मध्ये आक्षेपार्ह डान्सवर पोलिसांची करडी नजर; नियम मोडणाऱ्या मंडळांवर कारवाईचा इशारा देण्यात आला आहे.
दहीहंडी उत्सवात आक्षेपार्ह नृत्य खपवून घेणार नाही
पिंपरी-चिंचवड : दहीहंडी उत्सवाच्या नावाखाली अश्लील किंवा आक्षेपार्ह नृत्याचे प्रकार करणाऱ्या मंडळांना आता पोलिसांचा दणका बसणार आहे.
दहीहंडी कार्यक्रमांमध्ये आक्षेपार्ह नृत्य अथवा कायदा-सुव्यवस्थेला बाधा आणणारे प्रकार आढळल्यास संबंधित आयोजकांवर कठोर कारवाई केली जाईल, असा स्पष्ट इशारा पिंपरी-चिंचवडचे पोलीस आयुक्त विनयकुमार चौबे यांनी दिला आहे.
कार्यक्रमांवर पोलीस ठेवणार बारीक लक्ष
गणेशोत्सवापूर्वी दहीहंडीचा उत्सव मोठ्या उत्साहात साजरा केला जातो.
पिंपरी-चिंचवड शहरातील विविध भागांमध्ये यंदाही मोठ्या दहीहंडीचे आयोजन करण्यात आले आहे.
अनेक कार्यक्रमांमध्ये अभिनेत्री, अभिनेते, नामांकित खेळाडू आणि इतर प्रसिद्ध कलाकार सहभागी होणार असल्याने मोठ्या प्रमाणात गर्दी होण्याची शक्यता आहे.
दहीहंडीच्या कार्यक्रमांमध्ये मनोरंजनासाठी कलाकारांचे नृत्याचे कार्यक्रम आयोजित केले जातात.
मात्र, काही ठिकाणी नृत्याच्या नावाखाली अश्लील किंवा आक्षेपार्ह प्रकार घडल्याच्या तक्रारी यापूर्वी समोर आल्या आहेत.
अशा प्रकारांमुळे गर्दी वाढून गोंधळाची परिस्थिती निर्माण होण्याची शक्यता असते. त्यामुळे यंदा अशा कार्यक्रमांवर पोलिसांकडून विशेष लक्ष ठेवण्यात येणार आहे.
कायदेशीर कारवाई केली जाणार
प्रसारमाध्यमांशी बोलताना पोलीस आयुक्त विनयकुमार चौबे यांनी दहीहंडी आयोजकांना नियमांचे काटेकोरपणे पालन करण्याचे आवाहन केले.
उत्सवाच्या नावाखाली अश्लीलता किंवा कायदा-सुव्यवस्थेला धोका निर्माण करणारे प्रकार सहन केले जाणार नाहीत.
एखाद्या कार्यक्रमाबाबत तक्रार प्राप्त झाल्यास त्याची चौकशी करून संबंधितांवर कायदेशीर कारवाई केली जाईल, असे त्यांनी स्पष्ट केले.
गणेशोत्सवासाठीही पोलिसांची तयारी
दरम्यान, गणेशोत्सवाच्या पार्श्वभूमीवर पिंपरी-चिंचवड पोलिसांनी शहरातील गणेश मंडळांसोबत समन्वय बैठक घेतली.
उत्सव शांततेत आणि शिस्तबद्ध पद्धतीने पार पाडण्यासाठी मंडळांना आवश्यक सूचना देण्यात आल्या आहेत.
यंदाच्या गणेशोत्सवात लेझर लाईटच्या वापरावर बंदी असून, डीजे आणि ध्वनिक्षेपकांच्या वापराबाबतही शासनाने घालून दिलेल्या नियमांचे पालन करावे लागणार आहे.
ध्वनीप्रदूषण होणार नाही, याची काळजी घेण्याचे आवाहन पोलिसांकडून करण्यात आले आहे.
नियम पाळणाऱ्या गणेश मंडळांचा सन्मान
गेल्या वर्षी गणेश विसर्जन मिरवणुकीदरम्यान पोलिसांनी दिलेल्या सूचनांचे पालन करून शांततेत आणि संयमाने विसर्जन पार पाडणाऱ्या गणेश मंडळांचा यावेळी ‘श्री मोरया गणपती पुरस्कार’ देऊन सन्मान करण्यात आला.
नियमांचे पालन करणाऱ्या मंडळांना प्रोत्साहन देणे हा या उपक्रमामागील उद्देश आहे.
गणेश उत्सवात ध्वनी प्रदूषण नियमांचे पालन करा
दहीहंडी आणि गणेशोत्सव हे उत्साहाचे आणि आनंदाचे सण असले तरी या काळात कायदा-सुव्यवस्था राखण्याची जबाबदारी आयोजक आणि नागरिकांचीही आहे.
त्यामुळे दहीहंडी मंडळांनी आक्षेपार्ह कार्यक्रम टाळावेत, तर गणेश मंडळांनी ध्वनीप्रदूषण, लेझर आणि इतर नियमांचे पालन करावे, असे आवाहन पोलीस आयुक्तांनी केले आहे.
यंदाच्या उत्सव काळात नियमभंग करणाऱ्यांवर पोलिसांची विशेष नजर असणार आहे.
त्यामुळे उत्सव साजरा करताना मनोरंजनासोबतच सामाजिक भान आणि कायद्याचे पालन करण्याचे आवाहन पोलिसांकडून करण्यात आले आहे.
दहीहंडी उत्सवातील आक्षेपार्ह नृत्याच्या प्रकारांवर पोलिसांनी घेतलेल्या या भूमिकेबाबत तुमचे काय मत आहे? तुमचे मत कमेंट बॉक्समध्ये नक्की सांगा.
