प्रसिद्ध मराठी अभिनेत्रीसोबत अपहरणाचा प्रयत्न घडल्यामुळे पुण्यात खळबळ उडाली आहे. तक्रारीवरून गुन्हा देखील दाखल करण्यात आला आहे.
मराठी अभिनेत्रीसोबत धक्कादायक प्रकार, अपहरणाचा प्रयत्न
पुणे: कात्रज-देहूरोड बाह्यवळण मार्गावरील नवले पूल परिसरातून एक अत्यंत धक्कादायक आणि संतापजनक घटना समोर आली आहे.
‘लागिरं झालं जी’ या अत्यंत लोकप्रिय मराठी मालिकेत ‘मामी’ची भूमिका साकारून घराघरात पोहोचलेल्या प्रसिद्ध अभिनेत्री कल्याणी नंदकिशोर यांच्यासोबत हा भयंकर प्रकार घडला आहे.
काही अज्ञात गावगुंडांनी त्यांची गाडी अडवून आधी अपघात घडवला, पैशांची मागणी केली आणि नकार दिल्यावर त्यांना जबरदस्तीने ओढून नेण्याचा प्रयत्न केला.
याप्रकरणी नऱ्हे पोलीस ठाण्यात गुन्हा दाखल करण्यात आला आहे.
नेमकी घटना काय?
अभिनेत्री कल्याणी नंदकिशोर या मुंबईहून साताऱ्याच्या दिशेने स्वतःच्या कारने प्रवास करत होत्या.
रात्रीच्या सुमारास त्यांची गाडी पुण्यातील नवले ब्रिजजवळ आली असता, एका कारमधून आलेल्या चार जणांनी त्यांच्या गाडीचा पाठलाग केला.
संशयितांनी कल्याणी यांच्या कारला मागून आणि बाजूने जबरदस्तीने धडक दिली. गाडीचा अपघात झाल्याचे भासवून त्यांनी कल्याणी नंदकिशोर यांची गाडी रस्त्यातच अडवली.
हात ओढून पळवून नेण्याचा थरार
गाडी थांबवल्यानंतर त्या चारही जणांनी कल्याणी यांच्याशी वाद घालण्यास सुरुवात केली.
अपघाताची नुकसानभरपाई म्हणून त्यांनी अभिनेत्रीकडे मोठ्या रकमेची मागणी करत पैसे उकळण्याचा प्रयत्न केला. कल्याणी यांनी पैसे देण्यास स्पष्ट नकार दिला आणि पोलिसांना फोन करण्याचा प्रयत्न केला.
यानंतर संतापलेल्या त्या गावगुंडांनी थेट कल्याणी यांचा हात धरून त्यांना खेचले आणि जबरदस्तीने स्वतःच्या गाडीत बसवून पळवून नेण्याचा (अपहरणाचा) गंभीर प्रयत्न केला.
सुदैवाने कल्याणी यांनी स्वतःचा बचाव केला आणि तिथून सुटका करून घेतली. या झटापटीत त्यांना किरकोळ दुखापतही झाली आहे.
सोशल मीडियावर व्हिडिओ व्हायरल, पोलिसांत गुन्हा दाखल
या भयंकर प्रसंगानंतर कल्याणी नंदकिशोर यांनी सोशल मीडियावर एक व्हिडिओ शेअर करत आपल्याला आलेल्या थरारक अनुभवाची माहिती दिली आणि प्रशासनाकडे सुरक्षेची मागणी केली.
हा व्हिडिओ सोशल मीडियावर प्रचंड व्हायरल झाला असून या घटनेमुळे महिलांच्या सुरक्षेचा प्रश्न पुन्हा ऐरणीवर आला आहे.
घटनेची गांभीर्य दखल घेत नऱ्हे पोलिसांनी तातडीने दोघांविरुद्ध गुन्हा दाखल केला असून पुढील तपास सुरू केला आहे.
नवले पूल परिसरात वाढत्या गुन्हेगारीमुळे आणि गावगुंडांच्या दहशतीमुळे नागरिकांमध्ये तीव्र संतापाचे वातावरण निर्माण झाले आहे.
