बिग बॉस मराठी’ फेम आणि सोशल मीडिया इन्फ्लुएन्सर दिव्या सुनील शिंदे (वय २५) हिच्या अडचणीत मोठी वाढ झाली आहे.
दिव्या शिंदे हिच्या अडचणीत मोठी वाढ
पुणे: ‘बिग बॉस मराठी’ फेम आणि सोशल मीडिया इन्फ्लुएन्सर दिव्या सुनील शिंदे (वय २५) हिच्या अडचणीत मोठी वाढ झाली आहे.
पुणे कॅन्टोन्मेंट बोर्डाचे माजी मुख्य वैद्यकीय अधिकारी डॉ. विद्याधर गायकवाड (वय ६५) यांच्यावर झालेला जीवघेणा हल्ला आणि ५ लाख रुपयांच्या खंडणी प्रकरणात न्यायालयाने दिव्या शिंदेच्या पोलीस कोठडीत २ ऑक्टोबरपर्यंत वाढ केली होती.
या खळबळजनक प्रकरणात आतापर्यंत तब्बल १७ जणांचा सहभाग असल्याचे तपासात निष्पन्न झाले आहे.
नेमकं प्रकरण काय?
डॉ. विद्याधर गायकवाड यांच्या ‘करुणादीप फाउंडेशन’तर्फे बालगंधर्व रंगमंदिरात एका कार्यक्रमाचे आयोजन करण्यात आले होते.
या कार्यक्रमात आमंत्रण नसतानाही दिव्या शिंदे तिथे पोहोचली आणि तिने उपस्थितांना संबोधित केले. या सोशल मीडिया पब्लिसिटीच्या बदल्यात तिने डॉ. गायकवाड यांच्याकडे ५ लाख रुपयांची मागणी केली.
डॉक्टरांनी ही रक्कम देण्यास नकार दिल्याने दिव्या शिंदेने तिच्या ८ ते १० साथीदारांसह हडपसर येथील ‘न्याती हायलाईट्स’ मधील डॉक्टरांच्या निवासस्थानी बेकायदेशीरपणे प्रवेश केला.
तेथे आरोपींनी सामानाची तोडफोड करत ज्येष्ठ नागरिक आणि पॅरालिसिसचे रुग्ण असलेल्या डॉ. गायकवाड यांना काठ्या, बेल्ट आणि लोखंडी वस्तूने बेदम मारहाण केली व गंभीर जखमी केले.
याप्रकरणी पुण्याच्या काळेपडळ पोलीस ठाण्यात गुन्हा दाखल करण्यात आला असून पोलिसांनी दिव्याला अटक केली.
तपासात धक्कादायक खुलासे
पोलीस तपासादरम्यान या गुन्ह्याची पाळेमुळे खूप खोलवर असल्याचे समोर आले आहे.
या हल्ल्यासाठी आरोपींनी ८ दुचाकींचा वापर केला होता. पोलिसांनी प्रसिद्ध ‘ब्लू नाईल'(?) हॉटेलचे सीसीटीव्ही फुटेज ताब्यात घेतले असून, त्यात खंडणीच्या संदर्भात झालेल्या एका बैठकीचे पुरावे मिळाले आहेत.
या प्रकरणात मुख्य संशयित आप्पा ढमढेरे, निखिल शिंदे, त्याची पत्नी आणि ताहीर यांच्यासह इतर १३ अनोळखी व्यक्तींचा समावेश असल्याचे समोर आले आहे.
दिव्या शिंदेचे पोलिसांना असहकार्य
सरकारी वकील ॲड. आम्रपाली कस्तुरे यांनी न्यायालयात सांगितले की, चौकशीदरम्यान दिव्या शिंदे पोलिसांना अजिबात सहकार्य करत नाही.
ती माहिती देण्यास टाळाटाळ करते, पोलिसांसमोर विचित्र अंगविक्षेप करते आणि मोठ्याने आरडाओरड करते.
तसेच, चौकशी टाळण्यासाठी तिला ‘अँग्झायटी अटॅक’ (तीव्र चिंतावस्था) येत असल्याचा बनाव ती करत आहे.
हल्ल्यात वापरलेले लोखंडी हत्यार, लाकडी दांडके, डिजिटल पुरावे आणि मुख्य मोबाईल फोन अद्याप जप्त करणे बाकी असल्याने, तसेच या संपूर्ण कटाचा उलगडा करण्यासाठी पोलिसांनी तिची कोठडी वाढवून घेतली होती.
काळेपडळ पोलीस या प्रकरणाचा पुढील सखोल तपास करत आहेत.
