इंस्टाग्राम च्या माध्यमातून ओळख वाढवून आरोपीने तरुणीशी जवळीक साधली, त्यानंतर तिच्यावर अत्याचार केल्याचा आरोप करण्यात आला आहे.
इंस्टाग्राम च्या माध्यमातून वाढवली ओळख
जामनेर : तालुक्यातील नेरी दिगर परिसरातील एका तरुणीवर बलात्कार केल्याचा गंभीर प्रकार समोर आला आहे. इंस्टाग्रामच्या माध्यमातून ओळख वाढवून आरोपीने तरुणीशी जवळीक साधली.
त्यानंतर तिला जामनेर-भुसावळ रोडवरील एका लॉजवर नेऊन तिच्यावर अत्याचार केल्याचा आरोप करण्यात आला आहे. या प्रकरणी जामनेर पोलिस ठाण्यात गुन्हा दाखल करण्यात आला आहे.
अश्लील फोटो काढून, व्हायरल करण्याची धमकी
मिळालेल्या माहितीनुसार, पीडित तरुणीची आरोपीसोबत इंस्टाग्रामच्या माध्यमातून ओळख झाली होती. ओळखीचे रूपांतर मैत्रीत झाल्यानंतर आरोपीने तिच्याशी संपर्क वाढवला.
त्यानंतर आरोपीने तरुणीला जामनेर-भुसावळ रोडवरील एका लॉजवर नेल्याचे तक्रारीत नमूद करण्यात आले आहे. तेथे तिच्यावर जबरदस्तीने शारीरिक संबंध प्रस्थापित केल्याचा आरोप तरुणीने केला आहे.
इतकेच नाही, तर आरोपीने तरुणीचे फोटो काढले आणि ते फोटो व्हायरल करण्याची धमकी देत तिला मानसिक त्रास दिल्याचा आरोपही करण्यात आला आहे.
या प्रकारामुळे घाबरलेल्या तरुणीने अखेर पोलिसांकडे धाव घेत आपली तक्रार दाखल केली.
सोशल मीडिया वापरताना काळजी घ्या पोलिसांचे आवाहन
तरुणीच्या तक्रारीनंतर जामनेर पोलिसांनी संबंधित आरोपीविरोधात गुन्हा दाखल केला आहे.
पोलिसांकडून या प्रकरणाचा पुढील तपास सुरू असून, तक्रारीतील आरोपांची पडताळणी केली जात आहे.
आरोपीने सोशल मीडियाच्या माध्यमातून तरुणीशी कशा पद्धतीने संपर्क साधला, तसेच लॉजमध्ये नेल्यानंतर नेमका काय प्रकार घडला, याचा तपास पोलिसांकडून केला जात आहे.
दरम्यान, सोशल मीडियावर अनोळखी व्यक्तींशी मैत्री करताना नागरिकांनी विशेष काळजी घेण्याचे आवाहन पोलिसांकडून करण्यात येत आहे.
विशेषतः वैयक्तिक फोटो, व्हिडिओ किंवा माहिती अनोळखी व्यक्तींसोबत शेअर न करण्याचा सल्ला देण्यात येत आहे.
