धुळे व नाशिक परिसरात अलीकडे वाढलेल्या मंदिर चोरी च्या घटनांना पोलिसांनी मोठा धक्का दिला आहे. याप्रकरणी दोन सराईतांना पकडण्यात आले आहे.
मंदिर चोरी च्या मालिकेने भाविकांमध्ये संतापाची लाट
धुळे स्थानिक गुन्हे शाखा आणि संबंधित पोलीस ठाण्यांच्या संयुक्त कारवाईत मध्यप्रदेशातील दोन सराईत आरोपींना जेरबंद करण्यात आले आहे.
त्यांच्याकडून सुमारे 4 किलो चांदीचे दागिने आणि इतर मुद्देमाल जप्त करण्यात आला आहे.
पोलिसांच्या माहितीनुसार, धुळे व नाशिक जिल्ह्यातील काही मंदिरांमध्ये रात्रीच्या वेळी कुलुपे तोडून प्रवेश करून मूर्तींवरील चांदीचे मुकुट, छत्र, अलंकार आणि दानपेटीतील रक्कम चोरली जात होती.
या मंदिर चोरीच्या मालिकेने भाविकांमध्ये संतापाची लाट निर्माण झाली होती. सीसीटीव्ही फुटेज, तांत्रिक तपास आणि गुप्त माहितीच्या आधारे पोलिसांनी आरोपींचा माग काढला.
मध्यप्रदेशातून दोघांना पकडले
तपासादरम्यान पोलिसांनी विविध मंदिर परिसरातील सीसीटीव्ही फुटेजची तपासणी केली, गोपनीय माहितीदारांचे जाळे सक्रिय केले आणि आरोपींचा माग काढला.
त्यानंतर मध्यप्रदेशातील बडवाणी जिल्ह्यातील सेंधवा तालुक्यातील मोहाला येथील नवाडफल्या व नाहलाफल्या परिसरात छापा टाकून सदीम गिलदार देवका आणि भिकला रामसिंग देवका या दोघांना ताब्यात घेण्यात आले.
चौकशीत त्यांनी सावळदेसह विविध मंदिरांमधील चोरीची कबुली दिल्यानंतर त्यांना अटक करण्यात आली. न्यायालयाने दोघांना पोलिस कोठडी सुनावली आहे.
रोख रक्कम आणि दागिने केले जप्त
तपासात असे निष्पन्न झाले की, हे दोन्ही आरोपी मध्यप्रदेशातील रहिवासी असून ते सराईत गुन्हेगार आहेत. त्यांनी महाराष्ट्रात येऊन मंदिरे लक्ष्य केली होती. चौकशीदरम्यान आरोपींनी काही मंदिर चोरीच्या घटनांमध्ये आपला सहभाग असल्याची कबुली दिली.
त्यांच्याकडून चोरीचे चांदीचे दागिने (सुमारे 4 किलो), काही रोख रक्कम आणि गुन्ह्यात वापरलेली साधने जप्त करण्यात आली. मुद्देमालाची किंमत लाखो रुपयांत असल्याचे पोलिसांनी सांगितले.
पोलिसांनी या आरोपींवर संबंधित पोलीस ठाण्यांत गुन्हे दाखल करून पुढील तपास सुरू केला आहे. इतर सहआरोपींची शोधमोहीम सुरू असून आणखी मंदिर चोरीचे गुन्हे उलगडण्याची शक्यता आहे.
या कारवाईमुळे धुळे-नाशिक परिसरातील मंदिर चोरीच्या मालिकेला आळा बसण्याची अपेक्षा आहे. पोलिसांच्या या यशस्वी कारवाईची सर्वत्र चर्चा होत आहे.
