लग्नासाठी चांगला मुलगा मिळावा आणि समाजात स्वतःची रुबाबदार ओळख निर्माण व्हावी, यासाठी 21 वर्षीय तरुणीने रचलेला बनावट वर्दीचा डाव जळगाव रेल्वे स्थानकावर उलटला आहे.
असा उघड झाला बनावट पोलिसाचा खेळ
जळगाव: लग्नासाठी चांगला मुलगा मिळावा, सासरच्या लोकांवर प्रभाव पडता यावा आणि समाजात स्वतःची रुबाबदार ओळख निर्माण व्हावी, यासाठी एका २१ वर्षीय तरुणीने रचलेला बनावट वर्दीचा डाव जळगाव रेल्वे स्थानकावर पुरता उलटला आहे.
स्वतःला रेल्वे सुरक्षा बलाची (RPF) अधिकारी सांगून वावरणाऱ्या या तरुणीचा खऱ्या RPF पोलिसांनी मोठ्या चाणाक्षपणे भांडाफोड केला.
जळगाव रेल्वे स्थानकावर एक २१ वर्षीय तरुणी RPF च्या गणवेशात संशयास्पद रितीने फिरत असताना कर्तव्यावर असलेल्या खऱ्या आरपीएफ कर्मचाऱ्यांच्या नजरेस पडली. तिच्या हालचाली आणि वावरण्यावरून पोलिसांना संशय आला.
महिला आरपीएफ कर्मचाऱ्यांनी जेव्हा तिची चौकशी केली, तेव्हा तिने तिचे नाव मनिषा युवराज गोपाल (वय २१, रा. कापूसवाडी, ता. जामनेर, जि. जळगाव) असल्याचे सांगितले.
तिने आपली नियुक्ती नाशिक येथे आरपीएफमध्ये असल्याचे सांगत पोलिसांची दिशाभूल करण्याचा प्रयत्न केला.
मात्र, जळगाव आरपीएफने तात्काळ नाशिक येथील नियंत्रण कक्षाशी संपर्क साधून पडताळणी केली.
नाशिक विभागात या नावाची कोणतीही महिला कर्मचारी कार्यरत नसल्याचे समोर येताच, तिचा हा बनावट पोलिसाचा मुखवटा गळून पडला.
आधी महाराष्ट्र पोलिसांचाही वापर
पोलिसांनी केलेल्या सखोल चौकशीत आणखी एक धक्कादायक माहिती समोर आली.
आरपीएफची बनावट ओळख तयार करण्यापूर्वी, या तरुणीने चक्क महाराष्ट्र पोलिसांचा अधिकृत गणवेश परिधान करून वेगवेगळ्या रुबाबदार पोझमध्ये स्वतःचे छायाचित्रे (Photos) काढले होते.
हे फोटो ती लोकांना दाखवून स्वतः पोलीस दलात असल्याचे भासवत असे.
मुख्य उद्देश: विवाह आणि प्रभाव पाडणे
या तरुणीने हा बनावट डाव का रचला, याचा तपास केला असता धक्कादायक कारण समोर आले.
लग्नासाठी चांगल्या घरातील स्थळ मिळावे, हुंडा किंवा इतर गोष्टींमध्ये वजन पडावे आणि समाजात आपली एक वेगळी प्रतिष्ठा निर्माण व्हावी, याच एकमेव उद्देशाने तिने हा सगळा बनाव रचला होता.
कायदेशीर कारवाई सुरू
रेल्वे स्थानकासारख्या संवेदनशील ठिकाणी बनावट सरकारी अधिकारी बनून शासकीय गणवेशाचा गैरवापर केल्याप्रकरणी जळगाव रेल्वे सुरक्षा बल आणि स्थानिक पोलिसांनी या तरुणीविरुद्ध गुन्हा दाखल केला आहे.
तिने हा गणवेश कुठून मिळवला आणि यापूर्वी या बनावट ओळखीचा वापर करून कोणाची फसवणूक केली आहे का, याचा पुढील तपास पोलीस करत आहेत.
