१ ऑक्टोबर ते ३१ ऑक्टोबर २०२६ या कालावधीत संपूर्ण देशात एक विशेष प्रवाशांची तिकीट चेकिंग मोहीम राबवली जाणार आहे.
रेल्वेचा अलर्ट, प्रवाशांची होणार कडक तपासणी
नवी दिल्ली: आगामी सणासुदीचा काळ लक्षात घेऊन भारतीय रेल्वेने प्रवाशांसाठी एक अत्यंत महत्त्वाचा आणि कडक अलर्ट जारी केला आहे.
प्रवासादरम्यान होणारी फसवणूक आणि विनातिकीट प्रवासाला आळा घालण्यासाठी रेल्वे प्रशासनातर्फे १ ऑक्टोबर ते ३१ ऑक्टोबर २०२६ या कालावधीत संपूर्ण देशात एक विशेष तिकीट चेकिंग मोहीम राबवली जाणार आहे.
‘वन तिकीट, वन ओरिजिनल ID कार्ड’ (One Ticket, One Original ID Card) या नियमांतर्गत आता प्रत्येक प्रवाशाला आपल्या तिकिटासोबत मूळ ओळखपत्र दाखवणे बंधनकारक असणार आहे.
विशेष मोहीम आणि कडक तपासणी
दिवाळी आणि छठपूजेसारख्या मोठ्या सणांमुळे ऑक्टोबर महिन्यात रेल्वे गाड्यांमध्ये प्रवाशांची प्रचंड गर्दी असते.
याच गर्दीचा फायदा घेऊन अनेक जण अनधिकृतपणे किंवा इतरांच्या तिकिटांवर प्रवास करण्याचा प्रयत्न करतात.
हे रोखण्यासाठी रेल्वेने महिनाभर चालणारी ही विशेष मोहीम आखली आहे.
या काळात स्थानकांवर आणि धावत्या गाड्यांमध्ये तिकीट तपासणी करणाऱ्या कर्मचाऱ्यांची (TTE) संख्या वाढवली जाईल.
या कागदपत्रांची होणार कसून चौकशी
रेल्वेने स्पष्ट केले आहे की, प्रवासादरम्यान केवळ तिकीट असणे पुरेसे नाही. प्रवाशांना खालील कागदपत्रांचे मूळ (Original) स्वरूप सोबत ठेवावे लागेल:
- ओरिजिनल ID कार्ड: आधार कार्ड, पॅन कार्ड, मतदार ओळखपत्र किंवा ड्रायव्हिंग लायसन्स यांसारखी मूळ ओळखपत्रे तपासली जातील. फोटोकॉपी किंवा डिजिटल स्कॅन कॉपी (काही विशिष्ट अपवाद वगळता) ग्राह्य धरली जाणार नाही.
- सवलत आणि कोटा दस्तऐवज: ज्येष्ठ नागरिक, दिव्यांग किंवा इतर कोणत्याही कोट्यातून (Quota) किंवा कंसेशन (Concession) तिकीट बुक केले असल्यास, त्याशी संबंधित अधिकृत प्रमाणपत्र सोबत असणे आवश्यक आहे.
- ई-पास (E-Pass) आणि पीटीओ (PTO): रेल्वे कर्मचारी किंवा त्यांच्या नातेवाईकांनी ई-पास किंवा पीटीओ वापरून तिकीट काढले असल्यास, त्यांनाही त्यांची मूळ कागदपत्रे आणि ओळखपत्रे सादर करावी लागतील.
प्रवाशांना रेल्वेचे आवाहन
सणासुदीच्या काळात ऐनवेळी होणारा मनस्ताप आणि दंडात्मक कारवाई टाळण्यासाठी प्रवाशांनी घरून निघतानाच आपली सर्व मूळ कागदपत्रे सोबत ठेवावीत, असे आवाहन रेल्वे प्रशासनाने केले आहे.
जर एखादा प्रवासी योग्य ओळखपत्र दाखवू शकला नाही, तर त्याला विनातिकीट मानले जाईल आणि रेल्वेच्या नियमांनुसार तगडा दंड आकारला जाईल.
त्यामुळे सुरक्षित आणि चिंतामुक्त प्रवासासाठी रेल्वेच्या या नियमांचे काटेकोरपणे पालन करा.
